An Lineyte-Samarnon nga pinulungan o yinaknan, mas kilala nga “Waray” o “Waray-Waray”, amo an ginagamit nga pinulungan han mga tawo ha Leyte ngan Samar ha Pilipinas (mapa). An “Waray-Waray” nagtikang han pinakadako nga grupo han "Central Philippines" nga mga kapulungan. Ini nga mga pinulungan amo an Tagalog, Bikol, Visayan ngan ha sulod han Visayan nga mga yinaknan amo liwat an Cebuano, Hiligaynon ngan Mansakan. Ini an nagpapamatuud han sumat han Wikipedia nga nagsisiring an Lineyte-Samarnon nahasusulod han pamilya han pinulungan nga Visaya nga may kalabutan han Cebuano pero mas harani han Hiligaynon nga lenguahe. An magkalain-lain nga tawag hini amo an Samareño, Samaran, Samar-Leyte, Waray ngan Binisaya. Sugad man han iba nga mga pinulungan, an Lineyte-Samarnon nag-agi liwat hin damo nga pagka uru-utro o kabalhinan. Damo nga hinuram ngan bag-o nga pulong an nahadugang.

May ada mga tres (3) milyones nga katawhan ha Rehiyon 8 nga nagwiwinaray. Ini nga mga probinsiya amo an Sinirangan han Leyte (Eastern Leyte), Biliran, may la parte han Norte Katundan han  Leyte o Northwestern Leyte sugad han Capoocan, Leyte-Leyte, ngan Calubian,  Samar, Sinirangan Samar (Eastern Samar)  ngan Norte han Samar (Northern  Samar).

Usa han mga kaupayan han Lineyte-Samarnon nga pinulungan, amo an madali nga pagpahayag han karuyag sidngon ngan diretso nga pagyakan han ideya. Talagsa la an paggamit hin mga sinumpay nga mga pulong sanglit madali mahibaruan ngan masabtan. Iini an pipira nga mga pananglitan: “He walks fast.”, “Madagmit hiya lumakat.”, “The old is weak.”, “It lagas maluya.”, “They are cooking.”, “Nagluluto hira”.

Hinaut unta nga ini nga diksyunaryo makabulig han bisan hin-o nga may hingyap paghibaro han Lineyte-Samarnon nga pinulungan ngan han iba pa liwat nga karuyag magpahayag han iya mga ideya, gamit ini nga mga pinulungan.

Ginpapasalamatan hine nga "website" an ngatanan nga mga taga Leyte ngan Samar labi na adton mga sinauna pa nga henerasyon nga nagpadayon pagtimangno ngan pag pauru-upay han aton Lineyte-Samarnon nga yinaknan. Dako ine nga iginpaparayaw han mga Waraynon nga an Lineyte-Samarnon nga yinaknan amo an nagpabilin bisan kun damo na an mga termino nga nahadugang nga dire puro nga Winaray. An damo nga mga pulong nga iyo maaagian dinhe hine nga "website" amo an mga pinaka komon nga mga pulong o termino nga ginagamit ha kada adlaw-adlaw nga pakig iro-istorya ha mga kasangkayan, kapaturan ug mga bag-o nga kilala.

Salamat han mga taga Sinirangan Visayas , ngan hinaut unta nga malibang kamo ngan umayon hine nga "website".